नेपाल सम्वत् ११४६, सिल्लाथ्व ७, पञ्चमी (११ माघ, २०८२, २५ जनवरी, २०२६) आईतबार, बाँपिझ्याला । राष्ट्रिय वाणिज्य बैङ्क लिमिटेड ९आरबीबीएल० को ६१औँ वार्षिकोत्सवको अवसरमा बैङ्कले वित्तीय समावेशीकरण र डिजिटल बैङ्किङ सेवाको विस्तारलाई निरन्तरता दिँदै आरबीबी डिजिटल संसार मोबाइल बैङ्किङ एपमार्फत ‘आरबीबी फोनेलोन’ नामक नयाँ डिजिटल ऋण सेवा सुरु गरेको छ।यो डिजिटल कर्जा सेवा एफवानसफ्ट ग्रुप अन्तर्गतको फोनेलोन प्राइभेट लिमिटेडद्वारा प्रदान गरिएको छ, जसले पूर्ण रूपमा डिजिटल, छिटो र सहज कर्जा वितरण सुनिश्चित गर्दछ।

यस सेवामार्फत बैङ्कमा तलब बचत खाता रहेका योग्य ग्राहकहरूले हाललाई रु। १,००,००० सम्मको ऋण कुनै धितो, कागजी प्रक्रिया वा बैङ्क शाखा भ्रमण नगरी सिधै मोबाइल एपमार्फत तुरुन्तै प्राप्त गर्न सक्नेछन्। यो सेवा छिटो, सरल र सहज रूपमा औपचारिक ऋण पहुँच सुनिश्चित गर्न लक्षित गरिएको हो।

ऋणको सीमा तथा योग्यता बैङ्कले तोकेका मापदण्डअनुसार निर्धारण गरिनेछ, जसमा तलब जम्मा कारोबारको नियमितता, हालसालैका ऋण दायित्व तथा ऋण चुक्ता गर्ने व्यवहार समावेश छन्। ग्राहकहरूले एक महिनाको अवधिमा वा १२ महिनासम्म किस्ताबन्दी (ईएमआई) मार्फत ऋण चुक्ता गर्ने विकल्प रोज्न सक्नेछन्। साथै, पूर्व भुक्तानी सुविधा पनि उपलब्ध छ।

बैङ्कबाट मोबाइल बैङ्किङ सेवा लिइरहेका ग्राहकहरूले आरबीबी डिजिटल संसार एपमार्फत प्रमाणित इमेल ठेगाना प्रदान गरी सेवा दर्ता गर्न सक्नेछन्। योग्य ग्राहकहरूले आरबीबी डिजिटल संसार एपको ड्यासबोर्डबाटै ऋण आवेदन दिन सक्नेछन् र स्वीकृतिपछि सेवा उपभोग गर्न सक्नेछन्।

उक्त सेवा बैङ्कको ६१औँ वार्षिकोत्सव समारोहका अवसरमा नेपाल सरकारका अर्थमन्त्री रामेश्वर प्रसाद खनालले शुभारम्भ गरेका हुन्। आरबीबी फोनेलोन कर्जा सेवाका बारेमा उपभोक्ता बैङ्किङ विभागका विभागीय प्रमुख भोलानाथ पौड्यालले भने, “आरबीबी फोनेलोन सेवामार्फत ग्राहकहरूलाई सुरक्षित, सहज र पूर्ण रूपमा डिजिटल ऋण समाधान उपलब्ध गराउने हाम्रो उद्देश्य हो। प्रविधिको उपयोग गर्दै वित्तीय सेवामा पहुँच विस्तार गर्नु बैङ्कको प्राथमिकता हो।”

आरबीबी फोनेलोन सेवाको सुरुवातले राष्ट्रिय वाणिज्य बैङ्कको डिजिटल बैङ्किङ रूपान्तरणको यात्रालाई थप सुदृढ बनाउने विश्वास लिइएको छ।