नेपाल सम्वत् ११४६, सिल्लाथ्व ११, एकादशी (१५ माघ, २०८२, २९ जनवरी, २०२६) बिहीबार, बाँपिझ्याला । थनु भीमएकादशी देश दुपान दउ शक्तिपिठ दुन्दु भीमएकादशी ङाकेरै । आन्थीतु थुन द्वाल्खाकुङ दोलखा भीमेश्वर गुठी व्यवस्थापन समितीन् भीमएकादशी ङाके चोन । भीमएकादशी ङाकेये थि थि ज्य खँ पित हायन तरै । 

भीम एकादशी त घत्कें ल्याखाःन् स्वय् खोइँ दमु । महाभारतय् ब्यालालान् नसितु भीम एकादशीये न्हिखुन्हु त ड्वाक्कु एकादशीय् ल्याखाःन् स्वयेन् तय् दमु, हात्तहर्स महाभारतय् थिम्हा कलाकार भीमसेन्न्ये थउतु ब्यागल पुरुषार्थय् खँ दमु । भीम हङ बेस्न ड्वाकु, घ्यारदउ हङन् गिबिङ् गिबिङ् हङन् तरै तर भीमय् मूल अर्थ आनागुरि मखे, भीम हङ घत्के बल दउ, दोखुनु ज्ञान्न थिखाउ, हातिं खोँगनु मघ्याकु हङन् थुकेइमल ।

थन्हुये न्हिखुनु पाँचपाण्डवये दाजुकिँज मध्येकु माइला किँज भीमसेन व्रत उपवास काये न्हि जुयेलागिन् उ एकादशी त भीम एकादशी हङ खेउँ । गरुड पुराण बाखनकु हङ ल्याखाःन् स्वर्न भीमसेन बेस्न नइमल्गु, ल्होंगु आले घत्के बल दउ जुयेलागिन् हातिं ज्येखँय् व्रत च्वँइँ मफउ जेउ हङन् मेबु देउपिसिन् मन्कु टोँगन् चोङ्गु जु, तर भीमसेन्न थन्हुय् न्हिखुनु घत्कें खँपेन् त्वार्तयेन् थउत मल्गु ब्यालातु समर्पण येँगन् उ व्रत च्वँगन्तु दोखुनु देउपिसिन् टोँग खँ तमखेउ साबित येँगन् बिय् खेउँ ।

भीम एकादशीय् व्रत चोङन्ली सिङन् उइँ दोंगु पितृपेन् ऋणलान् मुक्त जुरहिन् हङन् तरै । गिथि कि बामलकु मुलकु लिङाउ जुजु (राजा) न् राज्य नासेत्न, मभिंगु मन्त्रीन् जुजु नासेत्न, मभिंगु कयेन् थउतु कुल नासेत्न, बानी बामलकु कालत्न थउ कैमु नासेत्न, अधर्मी पिसिन् थउ धर्म नासेत्न, असत्तिपिसिन् सत्यता नासेत्न, थउजुकुन् क्वाङन् मेपिस्त खोँगके तयेन् नासेत्न, अशिक्षितपिसिन् शिक्षा हो ज्ञान नासेत्न, गिनागु पापय् सजायँ छेरकु कायेन् भोगेरि मल हङ शास्त्रय् खँ त मन्कु तयेन् भीमसेन्न उ एकादशीखुनु व्रत कायेन् दोखुनु जीव मध्येकु बुद्धिदउ जीव मि (मनुष्य) त यिनागु बामलकु हो मभिंगु ज्येलान् टायेन् च्वँगन् दोखुनु असत त त्वार्त भिङ्गु मुलकु लिङाइत उ व्रतन् यक्कु ग्वाहार बिरै हङन् तरै ।

भीम एकादशीये व्रत चोङ्ली थउन मसिके अज्ञानवश हातिं ड्वाकु पाप येँगन् तर्सं कटैजुयेन् वन । उ व्रत कायेन्लि गुं ठाइँय् तिर्थ उइँमाबाल, गिबिङ् ओँगन् गुन्तं दान, जप होम यज्ञ येरिमल्गु जरुरी मद । आमु कारण्नं भीम एकादशीय् ड्वाकु महत्व दउजिन हँगन् थुकेइमल ।
आउ भीमसेन देउन तु व्रत चोग हँगन्लि गुरि देउये नाम कायेन् तयेन् व्रत चोईरीले हँग खँ पित यइफरै, उ व्रतउरि भगवान बिष्णुये अवतार कायेन् येउ बराह देउ त पूजा येरिउरि खेउँ । बराह देउये मूर्तित सिजलये पाताकु तयेन् त्वायउ वस्त्रन् यिँगन् ‘ॐ बराहाय नमः’ हँगन् पूजा आरती यरीउरी चलन दमु ।