Oct 01 2026 | २०८३, आश्विन १५ गते
२०८३, आश्विन १५ गते
Oct 01 2026 | २०८३, आश्विन १५ गते
नेपाल सम्वत् ११४६, गुंल्लाथ्वः ५ पञ्चमी (१ भाद्र २०८३, १७ अगष्ठ २०२६) सोमबार, बाँपिझ्याला । प्रतिनिधिसभामा आगामी भदौ १० गते प्रधानमन्त्री वालेन्द्र शाहसँग सांसदहरूको प्रत्यक्ष प्रश्नोत्तर कार्यक्रम हुने भएको छ।
सभामुख डोलप्रसाद अर्यालले प्रतिनिधिसभाको सोमबार बसेको बैठकमा प्रधानमन्त्रीसँग प्रत्यक्ष प्रश्नोत्तर कार्यक्रम भदौ १० गते सञ्चालन गर्ने जानकारी गराउनुभएको हो। उक्त कार्यक्रममा सांसदहरूले प्रधानमन्त्री शाहसँग सरकारका कामकारबाही, समसामयिक विषय तथा सार्वजनिक चासोका विषयमा प्रत्यक्ष प्रश्न गर्न पाउनेछन्।
सभामुख अर्यालका अनुसार प्रश्नोत्तर कार्यक्रममा सहभागी प्रत्येक सांसदले एकवटा मात्र प्रश्न सोध्न पाउनेछन्। सांसदहरूले प्रधानमन्त्रीलाई सोध्न चाहेको प्रश्न लिखित रूपमा दर्ता गराउनुपर्नेछ। त्यसका लागि भदौ ५ गते दिउँसो १ बजेसम्म प्रश्न दर्ता गरिसक्नुपर्ने व्यवस्था गरिएको छ।
प्रधानमन्त्री शाहलाई प्रत्यक्ष प्रश्नोत्तर कार्यक्रममा बढीमा १५ वटा प्रश्न सोध्न सकिने सभामुख अर्यालले जानकारी दिनुभयो। प्रश्नको संख्या सीमित भएकाले सांसदहरूले महत्वपूर्ण तथा जनसरोकारका विषयलाई प्राथमिकता दिनुपर्ने देखिएको छ।
सभामुख अर्यालले सांसदहरूलाई निरर्थक, अनावश्यक रूपमा लामो तथा विषयवस्तुमा स्पष्टता नहुने प्रश्न दर्ता नगर्न आग्रह गर्नुभएको छ। प्रश्नोत्तर कार्यक्रमलाई प्रभावकारी र सार्थक बनाउन छोटा, स्पष्ट र विषयकेन्द्रित प्रश्न दर्ता गर्न उहाँले आग्रह गर्नुभएको हो।
प्रतिनिधिसभामा प्रधानमन्त्रीसँग प्रत्यक्ष प्रश्नोत्तर कार्यक्रमले सरकारको कामकारबाहीबारे सांसदहरूले प्रधानमन्त्रीसँगै जवाफ माग्ने अवसर प्रदान गर्नेछ। यसबाट सरकारका नीति, निर्णय तथा समसामयिक विषयमा प्रधानमन्त्रीको प्रत्यक्ष धारणा सार्वजनिक हुने अपेक्षा गरिएको छ।
यसैबीच, प्रतिनिधिसभाको अर्को बैठक भदौ २ गते बिहान ११ बजे बस्ने सभामुख अर्यालले जानकारी दिनुभएको छ।
१९९७–०७७–०७८
© 2026 All right reserved to bampijhyala.com | Site By : Sobij
