नेपाल सम्वत् ११४६, गुंल्लागाः ५, पञ्चमी (१७ भाद्र २०८३, २ सेप्टेम्वर २०२६) बुधबार, बाँपिझ्याला । दोलखाको ऐतिहासिक तथा धार्मिक महत्व बोकेको भैरवकुमारी जात्रा यस वर्ष पनि भव्य रूपमा सम्पन्न भइरहेको छ। जात्रामा विभिन्न गुठी, सांस्कृतिक समूह तथा भक्तजनहरूको उल्लेखनीय सहभागिताबीच शिवभक्ती परिवारका युवापुस्ता विशेष आकर्षणको केन्द्र बनेका छन्।

परम्परागत संस्कृति, धार्मिक आस्था र सामाजिक एकतालाई निरन्तरता दिने उद्देश्यले शिवभक्ती परिवारका सदस्यहरू डिसन, सचिन र संजिव शिवभक्ती लगायतका युवापुस्ताको जात्रामा सक्रिय रूपमा सहभागी भएका हुन्। परम्परागत पोशाक, बाजागाजा, नृत्य तथा धार्मिक अनुष्ठानमा उनीहरूको उत्साहपूर्ण सहभागिताले जात्राको रौनक थप बढाएको छ।

पछिल्लो समय आधुनिक जीवनशैलीका कारण युवा पुस्तामा परम्परागत संस्कृतिप्रतिको आकर्षण घट्दै गएको चिन्ता भइरहेका बेला शिवभक्ती परिवारका युवाहरूले भने आफ्नो मौलिक संस्कृति र पहिचान जोगाउन अग्रसरता देखाएका छन्। उनीहरूको सक्रिय सहभागिताले नयाँ पुस्तालाई आफ्ना संस्कार, परम्परा र सांस्कृतिक सम्पदाप्रति जोड्न प्रेरणा मिलेको स्थानीयवासी बताउँछन्।

भैरवकुमारी जात्रा दोलखाको पुरानो धार्मिक तथा सांस्कृतिक पर्वमध्ये एक मानिन्छ। हरेक वर्ष जात्रामा हजारौं भक्तजन तथा दर्शक सहभागी हुने गर्दछन्। विशेषगरी भैरव र कुमारीको रथयात्रा, परम्परागत बाजागाजा तथा विभिन्न सांस्कृतिक प्रस्तुतिहरू जात्राका मुख्य आकर्षण रहने गरेका छन्।

यस वर्ष शिवभक्ती परिवारका युवाहरूको अनुशासित, उत्साहपूर्ण र सांस्कृतिक पहिचान झल्काउने सहभागिताले दर्शकको विशेष ध्यान तानेको छ। उनीहरूको सक्रियताले परम्परा संरक्षणमा युवापुस्ताको भूमिका कति महत्वपूर्ण हुन्छ भन्ने सन्देश पनि दिएको छ।

स्थानीय संस्कृतिको संरक्षण र पुस्तान्तरणका लागि यस्ता गतिविधिले महत्वपूर्ण योगदान पु¥याउने विश्वास गरिएको छ। भैरवकुमारी जात्रामा देखिएको युवापुस्ताको उत्साहले आगामी दिनमा पनि दोलखाको मौलिक संस्कृति अझ सशक्त रूपमा अघि बढ्ने अपेक्षा गरिएको छ।