Nov 15 2026 | २०८३, कार्तिक २९, गते
२०८३, कार्तिक २९ गते
Nov 15 2026 | २०८३, कार्तिक २९, गते
नेपाल सम्वत् ११४६, तछलागाः ११ द्वादशी (२७ अषाढ, २०८३, ११ जुलाई, २०२६) शनिवार, बाँपिझ्याला । दोलखाको ऐतिहासिक तथा सांस्कृतिक सम्पदाका रूपमा परिचित नक्छे प्रधान परिवारको कुलदेवता हाथ्व (आकाश भैरव) को मूर्ति सुरक्षालाई प्राथमिकता दिँदै शनिबार, २०८३ असार २७ गते भीमेश्वर मन्दिरको भण्डारमा स्थानान्तरण गरिएको छ।
करिब डेढ वर्षअघि विदेशबाट नेपाल फर्काइएको उक्त ऐतिहासिक मूर्ति यसै वर्ष असार ५ गते राष्ट्रिय संग्रहालयबाट आवश्यक कानुनी प्रक्रिया पूरा गरी नक्छे प्रधान खलकको जिम्मेवारीमा दोलखा ल्याइएको थियो। त्यसयता मूर्तिको संरक्षण, सुरक्षा र दीर्घकालीन व्यवस्थापनबारे छलफल तथा तयारी भइरहेका थिए।
सम्पदाको महत्वलाई ध्यानमा राख्दै हालका लागि मूर्तिलाई भीमेश्वर मन्दिरको भण्डारमा सुरक्षित रूपमा राखिएको सम्बन्धित पक्षले जनाएको छ। मन्दिरको भण्डारमा राखिएसँगै मूर्तिको सुरक्षा अझ प्रभावकारी हुने विश्वास गरिएको छ।
हाथ्व (आकाश भैरव) को मूर्ति नक्छे प्रधान परिवारको कुलदेवता मात्र नभई दोलखाको धार्मिक, सांस्कृतिक र ऐतिहासिक पहिचानसँग जोडिएको महत्वपूर्ण सम्पदा हो। लामो समय विदेशमा रहेपछि नेपाल फर्किएको यो मूर्तिले दोलखावासीमा विशेष खुसी र गौरवको अनुभूति गराएको थियो।
स्थानीय समुदायले यस सम्पदाको संरक्षण, उचित व्यवस्थापन तथा भावी पुस्तासम्म यसको ऐतिहासिक महत्व जोगाइराख्न सम्बन्धित निकाय र सरोकारवालाले निरन्तर पहल गर्नुपर्ने आवश्यकता औँल्याएका छन्। मूर्तिलाई सुरक्षित स्थानमा राखिएको यो कदमले दोलखाको सांस्कृतिक सम्पदाको संरक्षणमा महत्वपूर्ण योगदान पुग्ने अपेक्षा गरिएको छ।
१९९७–०७७–०७८
© 2026 All right reserved to bampijhyala.com | Site By : Sobij
