सिर्जना गोले
वङ्गु दँ ताक्कु जिल्लाय गुङ ठाँईकु बनखा फाराम मदउजु आउ भीमेश्वर नगरपालीका दुपान निस्गुर व कालिञ्चोक गाउँपालिकाकु थिगुर यङ ग्वारमुङन सोगुर बनखाय फाराम थापना जुयन हिलेन ययन चोङ्गु खँ सिदत ययन चोन । उ मध्यकु दोखुनु सोयत गत्के लगानी भीमेश्वर नगरपालकिा वडा ल्याखाः ७ स्थित मकैबारी महादेव खोकु बनखा लहिय लागिन् दुध पोखरी वाईल्ड लाईफ एग्रो बीथ रिसोर्ट प्रा.लि. चल्के तरै । आम फाराम छिरिङ शेर्पा लामा सुत्ता सोगुर मिसामीपे खलकन बनखा लहिए लागिन् चल्केय फाराम खेङ । आउ फारामकु काठमाण्डुलान् हाय थिस्दोल बनखाय खाचा तयन लहिएन चोङ फार्मय मुलमि (म्यानेजर) मिङगुर शेर्पान सिके दिरहिन् ।

भाजु मिङगुर शेर्पाय खँ थे बनखा लहिए लागिन् फाराम दकेनन्सी आउटुल्ले १ करोड ५० लाख टाका ढ्यावा लग्यारी धोङ दमु हर्स २५ रोपनी क्षेत्रफलय जग्गाकु बनखा फाराम चल्के तय दमु । फारामकु लहिएनतय बनखा आउय च्यालाकु तईय लागिन् तयार जुयउ हर्स फाराम दुपानाय जग्गा मध्यकु ङाला खुलान्ली १४ रोपनी जग्गाकु रिसोर्ट चल्केईरी खँ जुयन चोन । मेवु खँ हाती हर्स आउटुल्ले मिपे सामूहिक लगानी जुकुन जुयन चोन । ईथितु सरकारन ओल्तेचा व्याजकु ऋण उपलब्ध यत्के विर्स मेवु व्यवस्थापनय लागिन् ज्य खँ यरीय लागिन् योजना दउ खँ सिदत ययन चोन ।
वय नाप नापङ कालिञ्चोक गाउँपालिका स्थित सुन्द्रावतीकुङ बनखा फाराम चल्के बनखा फाराम हिल्केई ज्य खँ शुरु यरी धोङ खँ सिदत ययन चोन ।

कालिञ्चोक गाउँपालिका वडा ल्याखाः ९ सुन्द्रावतीकु टर्कि जातीय खान् नसी मृगटुल्ले लहिईरी लक्ष्य तयन आउ पहिला चरणकु बनखा लहिएन ययन चोन । भाजु सुदिप शिवाकोटी, कृष्ण प्रसाद शिवाकोटी, कृष्ण प्रसाद पकुवाल व टिका प्रसाद शिवाकोटीय थिगठकु फाराम चल्के हाखे ओङन चोनहिन् । फाराम हिल्केउ मध्य कृष्ण प्रसाद शिवाकोटी स्वीजरल्याण्ड व कृष्ण प्रसाद कटुवाल निस्मङ पिदेशय जागीरकु चोङन दिरहिन् । कालिञ्चोक वाईल्ड लाईफ एण्ड रिसर्च सेन्टर प्रा.लि.न आउ झीगुर रोपनी जग्गाकु पोखरालान् हायन सोसर बनखाय खाचा तयन तरै हर्स लोकल खापेनुङ लहिईरी व यउ दँकु टर्कीखानन्सी मृगटुल्ले लहिईरी योजना दके तय दमु हङन फाम हिल्के ययन चोङन दिउ सुदिप शिवाकोटीन् सिके दिए खँ सिदत ययन चोन । भाजु सुदिपय खँथे आउटुल्ले ५० लाख टाका ढ्यावा ल्याईरी धोङ खँ सिदत ययन चोन ।

ईथितु भीमेश्वर नगरपालीका वडा ल्याखाः ४ स्थित जिलु नागस्थानकुङ बनखा व लोकल खाय थिगुर फाराम चल्केय खँ सिदत ययन चोन । स्थानिय सरोज के.सीय खँथे ६ रोपनी जग्गाकु बागमती प्रदेश सरकारय ग्वाहारकु जेठय पहिला हप्तानन्सी बनखा व लोकल खाय फाराम हिल्केईकु हाय खँ सिदत ययन चोन । भाजुन हङथे प्रदेश सरकारलान् अनुदान यउ ९ लाख ७५ दोल टाका व थि थि मिपे साझीकु २२ लाख टाका ल्याङन फाराम दके पोखरालान् ङासर कालिजय खाचा हायन लहिई शुरु यङ खेङ । कालिज फाराम हिल्केईय लागिन् प्रदेश सरकारत निवेदन वियन्ली फाराम हिल्केईत ग्वाहार नाप लङ खँ सिके दिरहिन् ।

आउ पहिला ल्याखाःकु पिपानलान् खाचा ङ्याङन हाएन लहिर्सङ लिवि थउ ठाँईकु खाचा ठोके लहिईरी योजना दउ खँ सिदत ययन चोन ।
लिविय चरणकु मुलुक दुपान कोरोना भाइरसय महामारी संक्रमण फईलई जुयन्ली पिदेशकु चोङन दिउ व जिल्लाकु तु चोङन दिउ ल्यास्मापिसिन्नुङ बनखा लहिईरी खेन्न मन्न त्यात्के खँ सिदत ययन चोन ।

सारेङ : ई दोलखा अनलाईनलान् कायन दोलखा नेपाल भाषाकु उल्था यङ खेङ ।