साथीको साथीन् भीमसेन देउय मुल लुँखान्नसी दुत दोखुनु छाई यत्चु ।

भीम एकादशी त घत्कें ल्याखान् स्वये खोइँ दमु । महाभारतय् ब्यालालान् नसितु भीम एकादशीय् न्हिखुन्हु त ड्वाक्कु एकादशीय् ल्याखाःन् स्वयेन् तये दमु, हात्तहर्स महाभारतय् थिम्हा कलाकार भीमसेन्ये थउतु ब्यागल पुरुषार्थय् खँ दमु । भीम हङ बेस्न ड्वाकु, घ््यार्दउ हङन् गिबिङ् गिबिङ् हङन् तरै तर भीमय् मूल अर्थ आनागुरि मखे, भीम हङ घत्के बल दउ, दोखुनु ज्ञान्न थिखाउ, हातिं खोँगनु मघ््याकु हङन् थुकेइमल । ा
थन्हुय् न्हिखुनु पाँचपाण्डवय् दाजुकिँज मध्येकु माइला किँज भीमसेन्न व्रत उपवास काये न्हि जुयेलागिन् उ एकादशी त भीम एकादशी हङ खेउँ । गरुड पुराण बाखनकु हङ ल्याखाःन् स्वर्न भीमसेन बेस्न नइमल्गु, ल्होंगु आले घत्के बल दउ जुयेलागिन् हातिं ज्येखँय् व्रत च्वँइँ मफउ जेउ हङन् मेबु द्यउपिसिन् मन्कु टोँगन् च्वंगु जु, तर भीमसेन्न थन्हुय् न्हिखुनु घत्कें खँपेन् त्वार्तयेन् थउत मल्गु ब्यालातु समर्पण येँगन् उ व्रत च्वँगन्तु दोखुनु द्यउपिसिन् टोँग खँ तमखेउ साबित येँगन् बिये खेउँ ।

भीम एकादशीय् व्रत च्वँगन्लि सिङन् उइँ दोंगु पितृपेन् ऋणलान् मुक्त जुरहिन् हङन् तरै । गिथि कि बामलकु मुलकु लिङाउ जुजु (राजा) न् राज्य नासेत्न, मभिंगु मन्त्रीन् जुजु नासेत्न, मभिंगु कयेन् थउतु कुल नासेत्न, बानी बमलकु कालत्न थउ कैमु नासेत्न, अधर्मी पिसिन् थउ धर्म नासेत्न, असत्तिपिसिन् सत्यता नासेत्न, थउजुकुन् क्वाङन् मेपिस्त खोँगके तयेन् नासेत्न, अशिक्षितपिसिन् शिक्षा व ज्ञान नासेत्न, गिनागु पापय् सजायँ छेरकु कायेन् भोगेरि मल हङ शास्त्रय् खँ त मन्कु तयेन् भीमसेन्न उ एकादशीखुनु व्रत कायेन् दोखुनु जीव मध्येकु बुद्धिदउ जीव मि (मनुष्य) त यिनागु बामलकु व मभिंगु ज्येलान् टायेन् च्वँगन् दोखुनु असत त त्वार्त भिंगु मुलकु लिङाइत उ व्रतन् येक्कु ग्वाहार बिरै हङन् तरै ।

भीम एकादशीय् व्रत च्वँगन्लि थउन मसिके अज्ञानवश हातिं ड्वाकु पाप येँगन् तर्सं कटैजुयेन् वन । उ व्रत कायेन्लि गुं ठाइँय् तिर्थ उइँमाबाल, गिबिङ् ओँगन् गुन्तं दान, जप होम यज्ञ येरिमल्गु जरुरी मद । आमु कारण्नं भीम एकादशीय् ड्वाकु महत्व दउजिन हँगन् थुकेइमल ।
आउ भीमसेन द्यउन तु व्रत च्वँग हँगन्लि गुरि द्यउये नाम कायेन् तयेन् व्रत च्वइँरिले हँग खँ पित येइफरै, उ व्रतउरि भगवान बिष्णुय् अवतार कायेन् येउ बराह द्यउ त पूजा येरिउरि खेउँ । बराह द्यउय् मूर्तित सिजलय् पाताकु तयेन् त्वायउ वस्त्रन् यिँगन् ‘ॐ बराहाय नमः’ हँगन् पूजा आरती येरिमल ।

आउ द्वाल्खाखेन्न उइँलौ…
भीम एकादशीखुन्हु द्वाल्खाकु मेबुतु रौनक दमु । द्वाल्खा जिल्लाय् भीमेश्वर नगरपालिकाय् वडा ल्याखाः २ कु लकु भीमसेन द्यउय् देगलय् लाङाकु हातखुन्हु दशमीकु ईतार च्यात येउ भक्तजनपेन् थिखार येरहिन् । द्वाल्खा शहर पिपानय् मिपिसिन् पञ्चैबाजाक ठ््याँगन् बेलपत्र डोली (तान्दानी) कु तयेन् प्याखन् हुयेन् म्ये हलेन् ठाइँ ठाइँलान् बगालका बगाल मिपेन् थ्येन्द येरहिन् ।

हाबि हाबि वा हातखुनु द्वाल्खाय् थाब्न ट्वाल्कु जुहारी म्येथउपेन् थिबगाल भात्चा अलक्क च्वँगन् ल्यास्म्हा ल्यासिमिसापेन् दउजु, बजारकु टुँ, बदाम, सुन्तला, विकासे लेनपेनुं मिउपेन् दउजु । आउ थउ थउ ठाइँकु तु उब्जनी दयेलागिन् आनागु चलनुरि घसान् ताँगन् ओन । उ भीम एकादशीकु द्वाल्खाय् ल्याखाःन् स्वर्न भीमसेन् द्यउ त तु मान्यता बियेन् पूजाआजा येँग चलन दमु ।

थन्हुय् न्हि द्वाल्खाय् लागिन् घत्कें ड्वाकु तु नखत थिनागु तु खेउँ । यिनागु ताक्कु पिपान च्वंगु द्वाल्खाय् ड्वाकुन्दांगुपेन्, दाजुकिँज, ताताकेहेँपेन् दोखुनु ओँगन् थउ मौलिकताय् ज्येखँपेन, हाबि हाबिय् प्याखन्, झाँकीपेन् क्येँगन् ,द्वाल्खाकु तु सिकेय्, बुकेय् पांग, तरकारीपेन् तयेन् क्येइँफर्स अझ बाँलकु जुरा !

द्वाल्खाकु दउ खलक मध्य साथीको लागि साथी खलकय नाय् भाजु मनोज चाकुवजीय विशेष सक्रियता व ग्वाहारकु द्वाल्खाकु भीम एकादशीय व्यला लत्के मुल लुखान्नसी दुपान दोखुनु छाई यङन तरै । वय लागिन् छिजि दोखुसेय खेन्नलान् मनन्नसी भिङ्गु टोङन सुभाय् विई मल ।

यथ्थेँ येँगन् जुर्सं द्वाल्खाय् थउ मौलिकता त व संस्कृति त म्वात्के तइत हाखेन लिङायेन् च्वंगु आदरणीय व मान्यजनपिस्त आभार बियेन् दोखुसेतं भिंगु थ्वजु बाँलकु थ्वजु, भीमसेन द्यउन दोखसेतं बाँलकु थयत हङन आशिक फोङन चोनगु । जय भीमसेन । जय द्वाल्खा !